رباعيات

موضوع: رباعيات الإثنين يناير 25, 2010 4:36 pm

ما حد في الدنيا واخد جزاتــــه
و لا حــــــــد بيفكر في غير لذاذاته
ما تعرفيش يا حبيبتي .. أنا و انتي مين؟
إنتي عروس النيل … و أنا النيل بذاته
عجبي !!

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني …. و إيه العمل
عجبي !!!

أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!

إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!

- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي !!!!

من بين شقوق الشيش و شقشقت لك
مع شهقة العصافير و زقزقـــــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقــــــــتلك
عجبي !!!

********************
1
يا أمه يا مدرسه فيــها الفصــول بتبوش
اتهدت الاسوار دخلوا الكلاب فى الحوش
خافوا الاســاتذه من الضـــرب والبهـدله
لما زميلهم وقع مابين صـــــــوابع بوش
عجبى !!
********************
2
يا أم الهـرم والنيل والحسن بيكـــهرب
عايش فى حضنك عليل وكأنى متغرب
بتدلعى الاغـــــراب دايمــا ونسيــانى
واحاول اهـــرب منك القــانى بتقــرب
عجبى !!
*******************
3
ملايين بتصرخ من قلة الرحمه
لاطايله سمكه ولا فرخه ولا لحمه
حتى الرغيف المبعكك صعب المنال
علشان تنوله لابد الحرب فى الزحمه
عجبى !!
******************
4
ليه شكلى عــامل كــده قوليلى يا مـرايا
وشى كتــاب مفــتــوح والجسم بـــــرايه
نظرات عيون الجمال سابت فى قلبى ألم
وكل سن اتقصف ســـــاب نقطه جــــوايا
عجبى !!

********************

» رباعيات صلاح جاهين